"FUTBOLAK EZ DIGU KEINU ATSEGINIK EGITEN!"

Joan zen asteburuko emaitzari (4-4) eta sailkapenari begiratzen badiogu, taldeak zulo beltzean jarraitzen duela dirudi, baina azkeneko norgehiagoketan aritu garenok ,jakin badakigu, taldea gero eta hobeto ari dela, talde izaera asko indartu dela eta azken unera arte partiduak irabazteko zorian egon garela.

2-3-1 sistemak guztioi egiten digu mesede, atzean eustearekin nahiko larri aritzen garenontzat lasaigarri ere bada jakitea atzean bi Stopper ditugula, aurrelariari baloi gehiago iristen zaizkio eta ondorioz gol gehiago sartzen ditugu. Alde psikologikoak ere gora egin du...

Lezon elkartu ginenok ez genekien taldeak zein nolako maila eskainiko zuen, gerturatutako 3 jokalari kili kolo zeuden eta guztiok dakigu partidu osoa irauteko fisikoki nahiko larri gabiltzala. Azkenean 10 taldekide bildu ginen eta guztien aurpegian ilusioaren printzak antzeman zitezkeen baita partidua irabazteko grina ere.

Honako jokalariekin ekin genuen norgehiagoka: Julen Valderrama atezain, bai! gogoratzen al zarete nor den Julen? nik aspaldi galdu nion arrastoa..., Gari eta Astudillo atzelari, Aranburu, Pujol-Marti eta Falop zelai erdian eta Trole aurrelari. Quintana eta Oier kili kolo zeuden ,nahiz eta Oier Koikili izan nahi zuen, eta Kike ere zelai ertzean geratu zen.

Partidua hasi eta berehala lehenengo ezustekoa. Baloiaren jabetza era bat gurea zen eta baloia alde batetik bestera mugitzeko gaitasuna erakutsi genuen. Aurkariek beraien zelai erdian itxaroten gintuzten eta askotan guk izandako rola bereganatu zuten. Bitartean, lehenengo zatiko 20 minutuak aurten jokatutako onenak izan ziren inongo zalantzarik gabe. Baloia erraz mugitzeaz gain, sakontasuna genuen eta gol aukerak bata bestearen atzetik zetozen. Honen ondorioz talde 3-0 aurreratu zen atsedenaldira iritsi baino lehen. Alabaina lehen zatiko azkeneko minutuetan tokia galtzen hasi ginen eta betiko gabeziak azaleratu ziren.

Atsedenaldian jakitun ginen partidua ez zegoela irabazita , orain arteko ibilbidea zein izan den kontuan hartuta are gehiago. Bigarren zatiari ez genion behar bezala ekin, taldeak 10 metro atzera egin zuen eta ez genuen baloiaren jabetzarik. Orduantxe hasi zen gure galbidea. Konturatzerako aurkariak lehenengo gola sartu zigun eta minutu bat ondoren bigarrena. Markagailua asko estutu zen 3-2 eta zalantza asko sorrarazi zizkigun. Taldekide gehienen begiek belar sintetikoari begiratzen zioten gertatzen ari zen sinestu ezinik...

Une horretan aurkariaren joko erauntsia gelditu eta baloiaren jabetza geureganatu genuen. Honen ondorioz 4-2 jarri ginen Josuren 3. golari esker eta arnas pixka bat hartzen lagundu zigun. Arnasestuka aritu ginen baloiaren atzetik, ondorioz 2 gol sartu zizkiguten eta 4-4 berdinketa igo zen markagailura.Apenas minutu pare bat gelditzen ziren eta gure begiradek belarra antzemateaz gain belaunek lurrarekin topo egin zuten...

Pena da horrelako aukera on bati alde egiten uztea! Larunbatean Lezon gertatu zena krudela izan zen... Hala ere, taldea sendotzen ari da, zelai gainean gozatzen hasi gara eta laster emaitza onak iritsiko dira. Bagoaz, eta onena ibilbide honetan nola eta nora goazen badakigula da! Hurrengoan bai! Taldekide batek ondo laburbildu zuen jazotakoa...

Nor Baino Nor:

Julen (7) BIZIRIK Jakitun zen bere postuan azken aldian konpetentzi handia dagoela ... Lesio batetik irten berria eta gauaren iluntasunean argi pixka bat ikusten hasi da. Ongi etorri!

Astudillo (7) GORUNTZ Lehengo astean hobeto ari zela azpimarratu genuen, ba joko onari gol eder bat erantsi behar zaio. Motibazio gehiagorekin dabil azken aldian; larunbatean berarekin etorri zenak zer ikusirik ba al du?

Gari (6,5) BERDIN Taldeak erabaki bat hartu behar du. Atzean sendo ala zelai erdian goruntz? Defentsarako Stopper onak aurkitzen baditugu karrilero jarri dezakegu. Baloia Askatu!

Oier ( 6,5) KILI KOLO Lesio batetik irten nahian. Ez izan jokatu izanaren damurik! Aurten taldearekin era bat inplikatuta dago!

Kike (6) IMPLIKATUTA Azken aldian bai taldearen jokatzeko eran eta talde izaeran murgilduta dago. Gorantz doa! baloiarekin zailtasunak izan arren...

Pujol Marti (6,5) APAL Bigarren norgehiagoka taldearekin eta futbolean eta futbol7an duen esperientzia nabari zaio. Talde gizona era bat; fisikoki hobeto balego... Taldearen onuran zer ikusia izan du.

Aranburu (6,5) AZTI Eztanda noiz iritsiko zai gauzka. Magoek magia egitean hauts magikoak darabiltzate eta berak ezin ditu erabili , horixe ote?

Falop (6) EGOKITZEN Kosta egiten zaio txapelketaren erritmoa hartzea. Gauzak berdin esan daitezke inor aztoratu gabe. Gehiago eman dezake.

Quintana (6) UMIL Lesionatuta omen zegoen gau batean izandako aferarengatik. Bere postuan ere konpetentzi handia dago eta ea horrek espabilatzen duen....

Trole (8) GOLEGILE Sartutako 3 golek atea zulotzeko sena erakusten dute. Gutxitan erakusten duen txispa antzematen zitzaion. Jokaldi batzuetan hartutako erabakiekin ez zuen asmatu.

P.D: Aste bukaera honetan lehengoen aurka jokatuko dugu, 3 partiduak irabazi dituzte. Berrestuko al dugu azken aldiko bilakaera?